من شوية
اي ده !!
هو مكتوب (أنا شايفك) جسمي كله اتكهرب لما قرأت الكلام وروحت محدد كل الصور وحاذفها، وقمت وأنا مقرر أبطل اللي بعمله ده لأني اكتشفت إن فيه حاجات مرعبة أكبر من فكرة الخيانة.
ونمت تاني، نمت عشان أحس بالليل بحاجة بتزحف على رجلي، وكنت مشلول وكأنها حالة جاثوم، بس كنت شايف، شايف طفل لسة مولود وجسمه كله لزوجة وبيزحف عليا، وصوت السائل اللي بينزل منه بيرن في وداني، فضلت أشهق زي اللي روحه بتخرج منه لحد ما في النهاية فقت وصحيت، مسكت موبايلي وكانت الصدمة..
كل الصور اتمسحت إلا صور الست دي، حاولت امسحهم تاني وتالت ورابع، نزلت لمحل موبايلات فرمت الجهاز كله ولما روحت لقيت الصور تاني، وعرفت إني اتلعنت، لعنة تتبع العورات، والله أعلم هخرج منها تاني ازاي..
وبدأ الجحيم يتجسد ليا على الأرض بعد ليلة واحدة، لأني صحيت تاني ليلة على صوت واحدة بتتألم وبتزووم، صحيت مرعوب وفضلت أدور في الشقة على مصدر الصوت لحد ما عرفت إنه جاي من الحمام، فتحت الباب وشعر جسمي كله واقف عشان اتفاجئ بيها، الست إياها، نايمة في البانيو وجسمها غرقان دم وبتولد وعمالة بتنازع، وأول ما فتحت الباب بصتلي وفضلت تستغيث عشان أنجدها، وأنا واقف قدام المشهد زي الصنم، لحد ما حسيت بحاجة بتلمس رجلي، بصيت لقيت طفل بيزحف شكله بشع وسنانه ضخمة، وعضني من رجلي، وصرخت، صرخت ووقعت في الأرض..
وسمعت همساته، كان بيقولي أخلي أمه تولد الليلة وإلا هيدخل في بطني أنا، ومتحملتش لحظة تانية ووقعت من طولي، ولما صحيت كان فيه وجع في بطني لا يطاق، دخلت الحمام لقيت دم بينزل مني، دم اسود، جريت على المستشفى وبعد فحوصات وصراخ ووجع اتقالي إن فيه ورم غريب في المعدة مفيش ولا دكتور عارف سببه، والورم مزروع في جدار المعدة كلها، ومفيش دكتور هيغامر ويشيله لِأن فيها موتي..
وبدأت معاناة، حمام دم، قيئ دم، بقيت عايش على المحاليل وبس، كوابيس لا تطاق وبسمع صوت الطفل من بطني عايز يخرج، هيخرج منين وازاي إلا لو هيقطع بطني كلها، وافتكرت الست، جبت اسمها من تذكرة الكشف وعرفت عنوانها وروحت..
وعرفت إنها ست تقية، كل الناس بتشهد بأخلاقها، اتعملها سحر أسود وشربته في العصير، وماتت بسببه هي والجنين، وعرفت إني لسبب ما اتلعنت بالسحر ده واتأثرت بيه، بقيت عامل زي الهيكل العظمي وبدعي ربنا أموت انهاردة قبل بكرة.
لحد ما حد قالي إن اللي فيا ده مش مرض طبي ونصحني أزور شيخ، وروحت بالفعل، روحت وأنا ببكي وبقول يا رب بأعلى صوت، وبعد رقية طويلة تقيأت شلال دم اسود، واتنفست، اتنفست زي اللي كان بيغرق وطلع أخيرًا للنجاة..
تجربة متمنهاش لحد في الدنيا كلها، بس الدرس منها قاسي اوي، أخطائك مسئوليتك لوحدك، وأنا اخترت الدكتورة عشان مركزها وتجاهلت الدين والأخلاق، وكان لازم أتحمل نتيجة خطأي لوحدي، إنما أحمل الناس معايا الوِزر وانتقم لنفسي فيهم حتى لو مظلوم فده الهلاك، مش معنى إنك اتظلمت يبقا تظلم، أو اتسرقت تسرق، او ابتُليت في عِرضك يبقا تنتهك أعراض الناس، تحمل الظلم أهون ألف مرة من إنك تبقا ظالم، وزي ما قالوا زمان يا بخت من بات يوم مظلوم ولا بات في يوم ظالم وإياك ثم إياك من تتبع عورات الناس..
(من تتبع عورات الناس تتبع الله عورته)
بقلم: أحمد محمود شرقاوي
……….
لو عندك أي حكاية غريبة أو مخيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص على أكاونت أحمد محمود شرقاوي كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..
بقلم: أحمد محمود شرقاوي
